|
Celia Díaz Díaz
Buenas nochis querius paisanus. Porque p'a mí tos los que estáis esta nochi aquí sois paisanus.
No es la primera vez que me veis encaramá a un tablau de estus, pero sí pa lo que estoy esta nochi aquí, y pa esu m'he remuau, ¿qué sos paeci?: Na más que pa dar el pregón de las fiestas de San Roqui.
Algu que me llena buen dau de orgullu, por lo que doy las gracias al consistoriu por pensar en mí en este acto tan importanti. A ver si tengu albeliá.
A la vez me palpita to el cuerpu, como si un regilguete tuviera dentru y los deos estuvieran engarañaos, (a ver si no me añurgu) ya que no es lo mismu estar en un escenariu siendu un personaji, que estar aquí siendu una piornalega.
Y esu es lo que soy ahora, Celia, nacía en esti pueblu, haci ya, buenu, buen dau de añus y del que sólu salí pa estudiar y al que volví pa quedarmi, (si me tienin que echar que me echin a la juerza), porque siempri he teniu una cosa mu clarita, quería vivir en Piornal, tener mi casa aquí, aunque tuviera que trabajal fuera. Y es que es un privilegiu, sí paisanus, pa mi es un privilegiu vivir aquí, en el Camochu, en el pueblu más altu de Extremaura, comu yo digu muchas vecis.
Dicin que el liquen de los árbolis es señal d´airi puru. ¿a que esto está to rodeao de liquin?. No tendremus, por desgracia, monumentus y se nos murió nuestru queríu álamu, peru tenemus nuestrus alreoris, el Caozo, el Calderón, la Desesperá, los Llanos, el caminu la viña, y Peña Negra, los Jelechares, el Mojón Blancu, la Laguna, la mi Pedrosa (que pa mi es mu piornalega).
Nuestras callis con la nievi en inviernu (no precisamenti ésti, peru sí en otrus) y no poder ir a trabajal (porque yo no salgu cuandu hay nievi, ni con caenas del mieu que me da). Nuestra quería lancha resbalaera, ondi me queé más de un par de bragas cuandu era chica y la zapatilla de mi abuela en el culu y ondi, de vez en cuandu, cuandu me da un arrepiu me baju por ella. Los pinus que roean al pueblu, que son lo primeru que veu al levantarmi y el arroyu del Salvaor que m'arrulla muchas nochis en inviernu.
Porque querius paisanus, me sientu mu orgullosa de ser piornalega, no comu lo sentiría, creu yo, un nacionalista, porque yo respetu y valoru a tos los otrus pueblus, a toas las otras culturas, de las que siempri se aprendi algu buenu y no pensandu que mi pueblu es el mejor, peru sí es el míu, y como a tal tengu el deber y el derechu de querer y de luchar por él.
A la vez me sientu orgullosa, comu piornalega, de varias cosas de las que creu nunca me arrepentiré y pueu decir con la cabeza mu alta:
En primer lugar de haber cantau la rosca de San Sebastián y la Rosca de San Roqui (y esu que yo no soy mu religiosa precisamenti, buenu, no soy na religiosa) peru son dos cosas que dan carácter. Comu supongu que pa un hombri lo será el vestirsi de Jarramplas.
En segundu lugar de haber estau, hace 20 años, en la creación del grupu folklóricu. Yo participaba comu cantanti y creu que la música es de lo mejorcitu que tieni esti pueblu.¿quién no ha cantau una rondeña u una canción de boa por las callis u en alguna taberna?
En tercer lugar pertenecer al grupu de teatru "Tarandangu" es de lo mejor que me ha pasau. Gracias a él ha siu difícil que yo me aburriera aquí.
Y la revista Veleilu, de la que ahora hemus sacau la numeru 30: es pa mi comu la revulución francesa: del pueblu, por el pueblu y pa el pueblu.
Y por últimu estoy mu orgullosa de los mis amigus, de la mi familia y del mi hombri (que si no lo digu, algunu, bien prontu s'enfarrusca p'ahí.)
Sos estaréis preguntandu el motivu de que esté hablandu así u ya lo habréis adivinau por to lo dichu enderantis. Quería dend'aquí, con to el pueblu delanti, reivindicar el piornalegu comu una de las mejoris cosas que tenemus. Algu que nos reconoci allí ondi vamus. Yo esperu que no se pierda nunca, porque aunque hay mucha genti que tieni muchas palabras recopilás, no sirvin de na si no se utilizan. (Comu por ejemplu, cuandu voy a la carniciría y piu a Laura un siernu de carni pal cocíu. Si quieru un siernu, ¿pus qué voy a pedir?. Y si estoy barriendu ¿cómu llamu a la fusca?, pues fusca).
Dende aquí sos digu que ondi esta labor tieni que darsi, es dende chicus, que salgamus juera y no mos avergoncemus, comu no se avergüenzan en otrus sitius de jablar en su dialectu o idioma. Que no hablamus mal, sólu diferenti. Ahora, esu no quita pa que estudiemus y aprendamus muchu, que no seamus morrus ni cerraus de mollera, que hay que tener la menti abierta y comu dici el refrán "allí ondi vayas haz lo que veas"
Perdonarmi tantu relicariu para decirsus lo que sos tenía que haber dichu ya cuantá, peru si ya sos lo hubiera dichu, pus vele aquí, estu no sería un pregón.
Estamus en las fiestas de nuestru patrón: San Roqui.
Unas fiestas que se pusierun pa descansar y diveltirse los cuatru días: San Roqui, San Roqui el chicu, el perro y la perrunilla (porque no se debería ir a trabajal hasta el día diecinuevi). Y hay que respetal las fiestas de guardal, y si no hay que coger franguesas en los cuatru días, pos no se cogen, que no las va a pasar na, ya se cogerán dispues y si se caín unas pocas, pos que se caigan, esas no mos van a sacar de proes, pero sí mos van a dejá disfrutal de la fiesta.
No sos quieru aburrir más, lo que sí queru es pedil a san roqui tres cosa: salud pa tos, que al cabo y al fin es lo más importanti, que mos traiga agua, que buena falta jadi, sobre tó pa las castañas, esu sí, pa después de las fiestas, no se mos vuelva a estropear la verbena y tamién le piu calor, peru el calor humanu, unus con otrus, tos comu buenus hermanus.
Querius paisanus, que disfrutéis de esi calor que debería de haber en toas las fiestas y en to el añu, que disfrutéis lo primero de esta nochi, que disfrutéis de los amigus, de la familia. De los de dentro y de los de juera can venío a pasar las fiestas con nugotrus y esu los jace piornalegus. Disfrutad de la música, el baili, de la calli (que no están hechas las fiestas pa quealsi apoltronao en casa o en las peñas), que luegu quea muchu inviernu, disfrutad de los paseus y las terrazas, de los besus y los abrazus, (que en estas fechas son unus buenus pocus), y si hay que bebel y comer de más pues no pasa ni un pelito. Disfrutad de la fiesta y disfrutad de la vida.
Y comu jidi el cantá: "Viva mi pueblu Piornal, y vivan los piornalegus, San Roqui y San Sebastián, vivan tus ojus morenus".
Un beso a tos.
Viva San Roqui. Viva Piornal.
|
Si quieres escribirme: